العيد ... وآاااااااااااه من العيد ... بعيد عنكم من اسبوع لخمة وارهاق ....وانا متأكدة انه لبعد اسبوع رح يستمر التعب.... قولو لي كيف ؟؟
قبل العيد لفلفة على المحلات ... والا ؟ ... لازم الاهل يشترو لنا لبس جديد !! ... طيب شو الطقوس ؟ نبدأ طقوس الشراء أول شي بالفرجة ... المحل الفلاني عنده كذا والمحل العلتاني عندة كذا ... طيب وبعدين ؟ ايمتى رح نشتري ؟ الجواب : رح نشتري لما يجيكي وجع رجلين .... طيب آمنت بالله .
ثاني شي من طقوس الشراء هو المفاوضات .... انهو اوسلو والا كامب ديفيد والا سايكس بيكو ؟؟ المفاوضات مع البياعين ادهى وأمر ... كل واحد بيسوي حالو ملك السوق وبضاعتو ما في مثلها ... آمنت بالله ... طيب والاسعار ؟ الحمد لله كل اشي رخيص . بيبدأ من 500 ونط لفوق ... الا اذا استعديتي تشتري من بسطه... يلا مش مهم كثير ... مش انا يلي رح ادفع ههههههههههههه . طيب بيعين الله.
صحينا صباحية العيد على التكبيرات صلينا وكبرنا وحضرنا الخطبه ..... واجا الجد .. .
هاتي يا بنت السكين .... هاتي يا بنت طشوطة نحط فيها اللحمة .... امسكي يا بنت ساعديني بالتقطيع ... هاتي كذا ... ودي كذا .... سوي كذا .. .. الله يجيبك يا طولة البال!!
وكل شي كوم وموضوع الفوارغ كوم ثاني هههههههههههههههههه الله يعزكم . في ناس عندها هالاكلة هواية ... انا ما بحبها وبمووووووووووووووووت منها !!! لا بتنظيف ولا بأكل .
أجينا لموضوع الزوار والاهل والاقارب ... هاتي يا بنت بكرج القهوة ... ملي صحون الكعك ... اجلي الفناجين ... كثري شيكولاته بالصحن ....
المهم ما بدي اطول عليكم ... قلت ادخل المنتدى احكي لكم شو وضعي اليوم قبل ما احط راسي واروح في سابع نومة .... تاركة الرد على مسجات صحباتي لبكره
وكل عام وانتو بخير